اعقد ماكينة في العالم التي تصنع المعالجات للاجهزة الذكية والاسلحة الحديثة التي منعتها امريكا عن الصين ؟

  أعقد ماكينات التصنيع في العالم التي تصنع المعالجات الذكية بتقنية 5 نانو متر .

ماكينة متخصصة في صناعة الرقائق المتطورة بتقنية الليثوجرافيا فوق البنفسجية الفائقة .

 (Extreme Ultraviolet Lithography) 

ودي الماكينة اللي بتصنع الشرائح المتطورة اللي بيتم استخدامها في صناعة المعالجات بتقنية 5 نانو.

الماكينة دي حاليا تعتبر أهم ماكينات التصنيع في العالم، ثمنها حاليا 120 مليون دولار وبتتكون من 100 ألف قطعة، وفي شركة واحدة في العالم فقط هي اللي بتصنعها وهي شركة هولندية اسمها ASML .

في 2019 أمريكا منعت هولندا من بيع أحدث نسخة من الماكينة دي في إطار الحرب التجارية على الصين، وحاليا الصين بتمتلك فقط الجيل الأول منها اللي بيصنع شرائح بتقنية 14 نانو فقط .

بالرغم من إن الصين تعتبر هي مصنع الشرائح الأول على مستوى العالم من حيث الإنتاج، لكنها معتمدة بشكل شبه كلي على تقنيات أجنبية، وده كان واضح جدا لما تم فرض حظر أمريكي على شركة هواوي وازاي الشركة فشلت في تطوير معالج بدون الاعتماد على تقنيات أجنبية.

طبعا في ناس كتير مفكرة إن منع الصين من امتلاك الماكينة دي لأسباب تجارية فقط لكن ده مش صحيح .

السبب الرئيسي إن تقدم الصين في مجالات زي الذكاء الاصطناعي تطوير الأسلحة الحرب السيبرانية وغيرها من المجالات الخطيرة والمعقدة معتمد على امتلاكها أحدث تكنولوجيا وصلها البشر في صناعة الشرائح، لأن الشرائح هي العقل المفكر للأجهزة التقنية.

حاليا الرئيس الأمريكي "جو بايدن" عامل خطة لتطوير صناعة الشرائح في أمريكا ورصد لها 50 مليار دولار عشان يضيق الخناق أكتر على الصين في المجال، وتبعه في ده شركات تانية زي إنتل اللي هتسثمر 20 مليار دولار لتطوير صناعة المعالجات الخاصة بيها.

حاليا الصين هتفضل متخلفة عن باقي الدول الغربية في ظل عدم امتلاكها للجيل الثالث والأحدث من الماكينة دي  وهي حاليا بتحاول توصل للتقنية دي من خلال تحالف أكبر شركات تقنية صينية زي هواوي وشاومي وأوبو لبدء تطوير حاجة مشابهة، لكن وصولهم لصناعة ماكينة بالتطور والتعقيد ده في زمن قصير حاجة صعبة جدآ و شبه مستحيلة لأن الوصول للمستوى ده من التطور استغرق جهد ودراسة وإنفاق مليارات الدولارات على البحث العلمي من عام 1980 .